قول ما أقدرش

من طرف SSOO_66 السبت سبتمبر 05, 2009 10:10 am

نوعيات كتير من البشر ممكن تقابلها في مواقف متفرقة وبتبقى نفسك تسمع منهم الكلمة دي ... لأنهم وببساطة بيعملوا حاجة بنسميها في مصر " البحر طحينة " يعني بيغرقك لما تعتمد عليه في حاجة هو مش هيقدر يقدمهالك , وده مش معناه انه مش قادر يعملها لكن هو ماعندوش استعداد يقدمهالك .

الأصناف دي من البشر ما شاء الله منتشرة بشكل كبير جدا ممكن تلاقيه عريس جاي يتقدم لأختك او لبنتك ويعملك فيها عنتر ابن شداد وراكن الجمل تحت البيت وهيعيشها في خيمة بالتكييف ويكتبلها بير باسمها كمان وفي الاخر يطلع ماحيلتهوش اللضا .

واحد تاني يروح يتقدم لشغلانة ويعرض السي في بتاعة 7 صفحات , فيتقبل طبعا للشغل تيجي تتزنق مرة في حاجة من اللي كاتب انه محترف فيها تلاقيك واقف جنب زيرو كبير .

وتشوف نوعيات تانية من البشر كل همها في الحياة انها تغرقك وده بيتمثل في أبو العريف العربي اللي لازم تلاقي عنده إجابه لأي سؤال بتسأله .

أخيرا واللي عايز أقول من المقال ده قول ما أقدرش , لو حد طلب منك حاجة ما تعرفش تعملها اوماعندكش وقت لها او انت من الأساس مش عايز تساعده ما تتحرجش وقول ما أقدرش علشان ماتغرقوش ...